កម្លាំងនគរបាលខេត្តកំពង់ស្ពឺ ចុះបង្រ្កាបករណីគ្រឿងញៀនឃាត់ខ្លួនជនសង្ស័យដែលមានគ្រឿងញៀនជាប់នឹងខ្លួន៣នាក់ឆ្លេីយដាក់គ្នាដូចសម្លរកំពឹស…
(ខេត្តកំពង់ស្ពឺ)÷ ដោយអនុវត្ដតាមគោលការណ៍ណែនាំដ៏ខ្ពង់ខ្ពស់ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ យុទ្ធនាការបង្ការបង្រ្កាបបទល្មេីសគ្រប់ប្រភេទ និងការដឹកនាំបញ្ជាដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងជំនាញបានធ្វេីការល្បាតក្នុងភូមិសាស្រ្ដប្រទាក់ក្រឡា ដល់ចំណុចផ្លូវលំ ស្ថិតក្នុងភូមិតាមេម ឃុំជង្រុក ស្រុកគងពិសី បានឃាត់ខ្លួនមុខសញ្ញាសង្ស័យ១នាក់ ឈ្មោះ ជន់ វេហា ភេទប្រុស អាយុ២៤ឆ្នាំ នៅភូមិតាមេម ឃុំជង្រុក ស្រុកគងពិសី ដោយធ្វើការត្រួតពិនិត្យដកហូតបានម្សៅក្រាមសថ្លាសង្ស័យជាគ្រឿងញៀនចំនួន ២កញ្ចប់មធ្យម -ទូរស័ព្ទដៃ ១គ្រឿងម៉ាក Iphone និងឧបករណ៍ប្រើប្រាស់គ្រឿងញៀនមួយចំនួន។
លោកវរសេនីយ៍ឯក យ៉ាង សុខលី អធិការនគរបាលស្រុកគងពិសី បញ្ជាក់ថាដោយបានគោលការណ៍និងការសម្របសម្រួលនីតិវិធី ពីតំណាងអយ្យការ និងយោងតាមចំលើយរបស់ឈ្មោះ ជន់ វេហា កំលាំងនគរបាលសហការបន្តឃាត់ខ្លួនឈ្មោះ សុិន សារ៉ាត់ ភេទប្រុស អាយុ៣២ឆ្នាំ នៅភូមិបល្ល័ង្គរាជា ឃុំស្នំក្រពើ ស្រុកគងពិសី និងបានបង្កើតគណៈកម្មការធ្វើការឆែកឆេរត្រួតពិនិត្យរកឃើញម្សៅក្រាមសថ្លាសង្ស័យជាគ្រឿងញៀនចំនួន ១កញ្ចប់មធ្យម ទូរសព្ទដៃ ១គ្រឿង ម៉ាកOPPO ដាវ ២ដើម និងឧបករណ៍វេចខ្ចប់ប្រើប្រាស់គ្រឿងញៀនមួយចំនួន។
ក្រោយឃាត់ខ្លួនមុខសញ្ញាទី២ កំលាំងបន្ដឈានទៅឃាត់ខ្លួនឈ្មោះ ទិត សីហា ភេទប្រុស អាយុ៤០ឆ្នាំ នៅភូមិត្រាំខ្នា ឃុំស្នំក្រពើ ស្រុកគងពិសី ធ្វើការត្រួតពិនិត្យរកឃើញម្សៅក្រាមសថ្លាសង្ស័យជាគ្រឿងញៀន១កញ្ចប់តូច ទូរស័ព្ទដៃ ០១គ្រឿង ម៉ាកViVO និងឧបករណ៍ប្រើប្រាស់មួយចំនួន។
ប្រតិបត្ដិការបញ្ចប់បានបញ្ជូនជនសង្ស័យទាំង៣នាក់រួមជាមួយវត្ថុតាងគ្រឿងញៀន មកអធិការដ្ឋាននគរបាលស្រុកគងពិសី កសាងសំណុំរឿងនិងបញ្ជូនទៅស្នងការដ្ឋាននគរបាលខេត្ដកំពង់ស្ពឺ ចំណាត់ការតាមនីតិវិធី៕